תהילים פרק-נח עם טעמים וניקוד

דף הבית ספרי קודש אונליין ספר תהילים - מנוקד עם טעמים תהילים פרק-נח עם טעמים וניקוד

{א} לַמְנַצֵּ֥חַ אַל-תַּשְׁחֵ֗ת לְדָוִ֥ד מִכְתָּֽם: {ב} הַֽאֻמְנָ֗ם אֵ֣לֶם צֶ֭דֶק תְּדַבֵּר֑וּן מֵישָׁרִ֥ים תִּ֝שְׁפְּט֗וּ בְּנֵ֣י אָדָֽם: {ג} אַף-בְּלֵב֮ עוֹלֹ֪ת תִּפְעָ֫ל֥וּן בָּאָ֡רֶץ חֲמַ֥ס יְ֝דֵיכֶ֗ם תְּפַלֵּֽסֽוּן: {ד} זֹ֣רוּ רְשָׁעִ֣ים מֵרָ֑חֶם תָּע֥וּ מִ֝בֶּ֗טֶן דֹּבְרֵ֥י כָזָֽב: {ה} חֲמַת-לָ֗מוֹ כִּדְמ֥וּת חֲמַת-נָחָ֑שׁ כְּמוֹ-פֶ֥תֶן חֵ֝רֵ֗שׁ יַאְטֵ֥ם אָזְנֽוֹ: {ו} אֲשֶׁ֣ר לֹא-יִ֭שְׁמַע לְק֣וֹל מְלַחֲשִׁ֑ים חוֹבֵ֖ר חֲבָרִ֣ים מְחֻכָּֽם: {ז} אֱֽלֹהִ֗ים הֲרָס-שִׁנֵּ֥ימוֹ בְּפִ֑ימוֹ מַלְתְּע֥וֹת כְּ֝פִירִ֗ים נְתֹ֣ץ | יְהוָֽה: {ח} יִמָּאֲס֣וּ כְמוֹ-מַ֭יִם יִתְהַלְּכוּ-לָ֑מוֹ יִדְרֹ֥ךְ (חצו) חִ֝צָּ֗יו כְּמ֣וֹ יִתְמֹלָֽלוּ: {ט} כְּמ֣וֹ שַׁ֭בְּלוּל תֶּ֣מֶס יַהֲלֹ֑ךְ נֵ֥פֶל אֵ֝֗שֶׁת בַּל-חָ֥זוּ שָֽׁמֶשׁ: {י} בְּטֶ֤רֶם יָבִ֣ינוּ סִּֽירֹתֵיכֶ֣ם אָטָ֑ד כְּמוֹ-חַ֥י כְּמוֹ-חָ֝ר֗וֹן יִשְׂעָרֶֽנּוּ: {יא} יִשְׂמַ֣ח צַ֭דִּיק כִּי-חָזָ֣ה נָקָ֑ם פְּעָמָ֥יו יִ֝רְחַ֗ץ בְּדַ֣ם הָרָשָֽׁע: {יב} וְיֹאמַ֣ר אָ֭דָם אַךְ-פְּרִ֣י לַצַּדִּ֑יק אַ֥ךְ יֵשׁ-אֱ֝לֹהִ֗ים שֹׁפְטִ֥ים בָּאָֽרֶץ: (פ)

לקריאת תהילים לחץ כאן

בס''ד - כל הזכויות שמורות (c) ל J. Alan Groves Center - בתנאי רשיון CC-2.5

דילוג לתוכן